A cewar sashen ƙasashen waje na Kamfanin Dillancin Labaran Hauza, bisa ga rahoton kwamitin shirya taron, kafin fara manyan jawabai, an ba mahalarta damar gabatar da ra’ayoyinsu da tattaunawa. A cikin wannan ɓangaren ne Zakiya Maki ta gabatar da jawabi mai taken “Hare-haren Isra’ila; Bincike Mai Zurfi Kan Siyasar Duniya”.
Ci gaban taron ya kasance a ƙarƙashin jagorancin Dr. Shamsuddeen Hassan, Ibrahim Abubakar Mamuna, da Dr. Nusaiba Ibraheem Zakzaky.
A jawabin ta, Dr. Nusaiba Zakzaky ta yi bayani kan tarihin siyasar wajen Amurka, inda ta ce ƙasar tun kafuwarta tana cikin yaƙe-yaƙe a mafi yawan shekarunta na tarihi, kuma kusan shekaru 16 kacal ta shafe ba tare da shiga rikicin soja ba.
Ta jaddada cewa: Amurka ba ta da daidaitaccen hali guda ga dukkan ƙasashe; matsayinta yana canzawa ne bisa ga muradun siyasa da tattalin arziƙin da take nema. Bisa ga maganarta, ƙasashen da ke bin tafarkin manufofin Amurka sukan tsira daga matsin lamba, amma waɗanda suke ƙin bin wannan tsari, sukan fuskanci tuhumar siyasa ko matsin lambar kare haƙƙin ɗan adam.
Ta bayyana bambancin halayen Washington ga ƙasashe irin su Saudiyya da Iran a matsayin misali karara, sannan ta ƙara da cewa haka nan akwai irin waɗannan mu’amala da ƙasashen Venezuela da Cuba.
Daga bisani, Ibrahim Abubakar Mamuna ya yi ishara da wani ɓangare na boyayyen shirin tsarin mulkin Amurka, yana mai cewa wannan tsarin ya ba ƙasar damar samun tasiri mai yawa a harkokin siyasar duniya.
Ya ƙara da cewa akwai babbar tazara tsakanin abin da ake faɗa a matsayin tarihin hukuma na Amurka da kuma ainihin yadda take gudanar da aikinta na siyasa.
Ya kuma yi nuni da cewa rashin ƙarfaffen tushen al’adu ko wayewar kai a Amurka, idan aka kwatanta da tsofaffin manyan dauloli, ya haifar da muhawara mai yawa game da matsayinta da rawarta a siyasar duniya.
A ɓangaren ƙarshe na zaman, Dr. Shamsuddeen Hassan ya yi nazari kan tsarin da ke mulkin siyasar duniya. Ya bayyana cewa tsarin yanzu yana da tushe ne a ƙarfin tsofaffin dauloli waɗanda suka raba ƙasashe, albarkatu, da ma tsarin tattalin arziƙi da zamantakewar duniya.
Ya yi bayani da cewa: “A wani lokaci Birtaniya ce cibiyar wannan tsari, amma bayan ta raunana, sai Amurka ta shiga, ta kafa sabon tsarin duniya, wanda tasirin sa har yanzu yana bayyana a mu’amalar ƙasashen duniya.”
Ra'ayinka